Magna Ferreira

         

Soprano, directora e profesora.

Magna Ferreira é docente no Curso de Música Antiga da Escola Superior de Música e Artes do Espectáculo (Instituto Politécnico do Porto) e no Conservatório de Música do Porto. É licenciada en Canto pola ESMAE (Escola Superior de Música e Artes do Espectáculo, Oporto), mestra en Educación Musical pola Universidade do Minho e mestra en “Advanced Vocal Ensemble Studies” pola Schola Cantorum Basiliensis (Suiza). É doutora en Musicoloxía pola Facultade de Historia da Universidade de Santiago de Compostela e investigadora colaboradora do CITCEM (Centro de Investigação Transdisciplinar «Cultura, Espaço e Memória») da Facultade de Letras da Universidade do Porto.

Foi membro do Estúdio de Ópera da Casa da Música. Como solista, presentouse en Portugal, España, Francia, Italia, Suíza, Polonia, México, Angola e Brasil. Destaca a súa participación na estrea moderna de Joaz (no papel de Athalia), de Benedetto Marcello (Festival Obra Aberta, Casa da Música, 2003), e en As Três Barcas, de Gil Vicente/Fernando Lapa (Festival Dias da Música, CCB, 2018 / Toy Ensemble).

Como mestra, integrou o equipo artístico da Área da Comunidade en Guimarães Capital da Cultura, foi directora do proxecto Vozes do Românico (Rota do Románico) e dirixiu a Orquestra Barroca da ESMAE nas óperas Acis and Galatea, de Haendel; Dido and Aeneas, de Purcell; e Il combattimento di Tancredi e Clorinda e Ballo delle Ingrate, de Monteverdi. Dirixiu diversos grupos corais e orquestrais e gravou a estrea de obras de compositores portugueses.

Colaborou co Servizo Educativo da Casa da Música, destacando a preparación da obra Da primeira liberdade (concerto preinaugural do Grande Auditório da Casa da Música, 2005), de Fernando Lapa. Traballou tamén como formadora co Teatro Nacional de S. João, o Centre Culturel de Rencontre Ambronay, a Universidade do Minho, a Universidade Lusófona, entre outros. Gravou para Antena 2, RTP, Challenge Classics, Au Fil de l’air, entre outros.

Impartiu clases maxistrais de Canto (Música Antiga) e de música vocal de conxunto en Angola, Brasil, España, Francia e Italia. Na actualidade, dedícase á investigación do repertorio conventual feminino portugués no Antigo Réxime. Neste contexto, fundou e dirixe o grupo de música antiga “Metáfora das Flores”.